Dúas persoas investigadas en Salvaterra e Ponteareas e unha detida en Arbo por incendios forestais
Os investigados facían traballos de limpeza do monte sen autorización cando lles prendeu o lume
O incendio en Pesqueiras arrasou 56 hectáreas de monte e especies arbóreas
A Garda Civil investiga dous homes na provincia de Pontevedra como presuntos autores dun incendio forestal en Salvaterra de Miño e detivo outro en Arbo por un segundo incendio.
No primeiro caso, o Servizo de Protección da Natureza (Seprona) de Tui vincula co suceso un veciño de 60 anos de Salvaterra e outro de 40 de Ponteareas.
O incendio produciuse o 28 de xullo no monte Codesal, na parroquia de Pesqueiras, e afectou 56 hectáreas de monte raso e árbores.
As investigacións apuntan ao condutor dun tractor que provocou o incendio mentres rozaba baixo unha liña eléctrica e ao propietario da empresa responsable do traballo, que se facía sen autorización.
As dilixencias xa foron remitidas ao xulgado de garda de Ponteareas.
Un detido en Arbo
Por outra banda, a Garda Civil detivo en Arbo o presunto autor doutro incendio forestal.
O presidente da Xunta, Alfonso Rueda, valorou a actuación das forzas de seguridade e insistiu en que se investigan todos os incendios, se persegue os incendiarios e se poñen a disposición xudicial.
