Avalían os danos que provocou un incendio na empresa de residuos do Porriño
O lume destruíu unha das naves, que se veu abaixo mentres traballaban os bombeiros
Investigan a orixe do incendio pero todo apunta a unha reacción química no lixo que chega ás instalacións
Volveu pasar. Unha nube de fume, negra e densa, puxo en alerta a comarca.
"Pasou máis veces. Hai cinco anos, a última vez", confirma un traballador.
Os incendios repetidos non son por casualidade. A esa planta de residuos chega todo tipo de materiais. Moitos perigosos e tóxicos.
"Chegou o último camión e revisárono. Foi na zona onde se amontoa todo o material e non se sabe se foi unha reacción química dalgún produto que viña no camión pero aínda é cedo", explica Carlos Martínez, o tenente de alcalde do Porriño.
Hoxe toca avaliar danos. Unha parte das instalacións quedou arrasada.
"Colapsou a cuberta da nave, que é unha cuberta que ten vigas de formigón. Hai unhas vigas que están moi danadas e que temos que retirar tamén con maquinaria pesada. As oficinas teñen acumulación de auga pero os traballadores teñen acceso porque non hai perigo", detalla Patxi Mariño, o xefe da intervención.
Por dimensións e por perigosidade, foi preciso mobilizar varios parques de bombeiros. Mesmo compañeiros do norte de Portugal. Cando chegaron o incendio xa estaba moi avanzado, polo que centraron os esforzos en evitar que non se estendera a outras zonas da empresa.
"O problema era na propia nave onde estaban os produtos, a propagación pola cinta transportadora e pola propia cuberta, cara a un amoreamento de microplásticos moi altamente inflamables", engade Mariño.
Controlárono en pouco tempo, pero tardaron horas en dalo por extinguido.
"Retirar todo o lixo que temos dentro da nave, que é un proceso que se ten que ir facendo con maquinaria pesada e refrixerar. É un traballo máis lento. O problema era a propagación dese lume a outras zonas da nave que supoñía un risco moi elevado pero iso controlouse", sinala o xefe dos bombeiros.
Por precaución, chegouse a activar o Platerga, un plan para minimizar riscos para a poboación e para o medio ambiente. Finalmente, non foi preciso confinar veciñanza nin tampouco se viu afectada a subministración de auga.
