Atropelado un técnico sanitario mentres participaba na asistencia dun accidente na A-52
Formaba parte do operativo de asistencia a un accidene entre dous coches no punto quilométrico 239 da autovía, na zona de Feá, en Toén
Un técnico sanitario quedou ferido de gravidade na tarde de onte sábado ao ser atropelado por un vehículo mentres participaba nun operativo de asistencia a un accidente de tráfico na autovía A-52, ao seu paso polo municipio ourensán de Toén.
Segundo informa o 112 Galicia, o aviso por este accidente chegou ás 19:15 horas a través da chamada dun particular que informaba dunha colisión entre dous vehículos no punto quilométrico 239 da autovía, na zona de Feá.
O técnico sanitario foi atropelado por un terceiro vehículo.
No primeiro sinistro entre dous coches non se rexistraran persoas feridas. Avisado o 112, ata o lugar desprazáronse os Bombeiros do Carballiño, o GES de Ribadavia, a Garda Civil de Tráfico, efectivos de Protección Civil e o Servizo de Urxencias Sanitarias de Galicia-061,.
Minutos despois, ás 19:40 horas, os Bombeiros desprazados comunicaron ao 112 Galicia que un técnico sanitario fora atropelado por un terceiro vehículo mentres colaboraba nas tarefas de atención ao accidente inicial.
O profesional resultou ferido de gravidade e foi trasladado polo persoal sanitario ao centro hospitalario de referencia.
