As primeiras mil mostras do proxecto Xenoma Galicia completaranse en xuño
As primeiras mil mostras do proxecto Xenoma Galicia completaranse en xuño
Os participantes, de entre 35 e 65 anos, escolleranse de xeito aleatorio e serán convocados polo Sergas
A primeira fase céntrase no cribado do cancro de mama e de ovario hereditario, a síndrome de Lynch e a hipercolesterolemia familiar
A primeira fase do proxecto Xenoma Galicia vaise centrar no cribado de tres enfermidades: o cancro de mama e de ovario hereditario, a síndrome de Lynch, asociado a un maior risco de padecer cancro de colon, e a hipercolesterolemia familiar.
"Son enfermidades nas que a súa detección temperá axuda a que poidas frealas, nalgúns casos dependendo da estratexia terapéutica poidas previr ou mellorar o seu prognóstico. Son o que nos chamamos na ciencia 'enfermidades accionables'. Detectalas de xeito temperá permite mellorar o seu prognóstico”, explica María Brión, coordinadora do Proxecto Xenoma Galicia.
As primeiras mil mostras xenéticas completaranse no primeiro semestre de 2024. Os participantes, de entre 35 e 65 anos, serán escollidos de xeito aleatorio e convocados polo Sergas a través dunha mensaxe no seu móbil.
Quen acepte participar recibirá unha toma de mostra de saliva. Terán que entregala no seu centro de saúde ou en calquera farmacia. O obxectivo é recoller en cinco anos as mostras xenéticas de 400.000 persoas.
O proxecto Xenoma Galicia inclúe a creación dun Biobanco con 100.000 mostras de sangue, plasma e soro. Estarán dispoñibles para futuros estudos científicos e para desenvolver novos fármacos.
_frame_5592.png)
