Galicia rexistra case un milleiro de raios nunha nova xornada de treboadas
Durante a tarde activouse o aviso amarelo por choiva na costa norte e no interior das provincias da Coruña e Pontevedra
Galicia rexistrou máis de 949 raios este sábado, 3 de maio, nunha nova xornada de alerta amarela por fortes choivas e treboadas, segundo a información de Meteogalicia.
O aviso activouse entre as tres da tarde e as nove da noite no litoral norte e no interior das provincias da Coruña e de Pontevedra. Nalgúns puntos, rexistráronse trebóns importantes acompañados de sarabia.
Este venres, en pouco máis de 24 horas, contabilizáronse 1.200 lóstregos e o 112 atendeu un total de 62 incidencias, aínda que non se rexistraron danos persoais. Sobre todo, houbo asolagamentos e caeron obxectos ás estradas.
Asolagamentos en Vigo
Cando comeza a chover con forza, en poucos minutos, parte da rúa Robleda, no barrio vigués de Teis, convértese nunha lagoa. A auga sae polos sumidoiros e acaba por entrar nas casas.
Encarna Vázquez, veciña desta rúa, explica que "cando chove, por pouco que sexa, sae a auga polos sumidoiros e entra na casa. Non podemos ir a ningures porque non sabemos cando se vai encher".
Na porta seguinte, Mercedes Abeledo, comparte a súa preocupación.
"Cando vén unha tromba de auga, éntranos pola porta, que temos o salón na entrada e estraga mobles, o chan e hai que limpalo porque cheira que apesta".
Non é a primeira vez, e os veciños temen que tampouco sexa a última.
"Este ano xa van catro veces. Viñeron mirar, pero aos técnicos pareceríalles tan complicado, pero din que como é puntual pasa unha vez cada ano e iso é imposible", lembra Fernando Mulet.
Colocan comportas á entrada das casas para tentar frear o avance da auga. Fernando Alonso faino na súa casa e lamenta que malia todo "a auga entra polo garaxe e sae polo patio. Un desastre".
Puxéronse en contacto co Concello e enviaron varios escritos.
"Pedimos unha reunión co responsable de obras e non temos contestación. Vivo cunha persoa con minusvalía, eu xa son maior e limpar todo cada vez que pasa é un problema moi serio", lamenta Mercedes.
Aseguran que as obras nesa rúa agravaron o problema e urxen unha solución que lles permita acabar co medo á chuvia.
