Morre un home de 49 anos e o seu fillo de 21 nun incendio na súa casa de Mugardos
A Garda Civil descubriunos logo de que uns familiares alertaran de que non tiñan noticias deles desde o pasado mércores
As primeiras hipóteses apuntan a unha morte por inhalación dos gases provocados por un incendio que puido comezar nun sofá
A Garda Civil investiga o falecemento de dúas persoas, un home de 49 anos e o seu fillo de 21, localizados sen vida no interior dunha vivenda de Mugardos.
O achado produciuse tras a alerta de familiares, que non tiñan noticias de ambos desde o pasado 24 de decembro. Ao acceder ao inmoble, os axentes observaron que o interior presentaba signos evidentes de sufrir un incendio, con diversas estancias afectadas polo fume e a calor.
Os corpos foron localizados nunha das habitacións da vivenda. O inmoble foi asegurado e activouse o correspondente protocolo xudicial, quedando o caso baixo investigación.
Á espera dos informes técnicos e forenses correspondentes, non se descarta que o falecemento puidese estar relacionado coa inhalación de gases derivados da combustión, extremo que deberá ser determinado pola autopsia.
As primeiras informacións apuntan a que o lume puido comezar nun sofá.
🔴#AXEGAInforma do achado de dúas persoas falecidas no interior da súa vivenda
— 112 Galicia (@112Galicia) December 26, 2025
📌 Rúa dos Catro Ventos, Mugardos
➡️ Gases acumulados por un sofá calcinado é causa máis probable
🚨 Urxencias Sanitarias de Galicia-061, Bombeiros Eume, GES Mugardos, Policía Local, @copgalicia pic.twitter.com/xNDUJ3KCW5
Ata o lugar desprazáronse efectivos de Urxencias Sanitarias de Galicia-061, Bombeiros Eume, GES Mugardos, Policía Local.
