A maior tormenta xeomagnética en décadas tinguiu o ceo galego de cores

Verdes, vermellos e mesmo azuis. Son as cores que debuxaron no ceo galego as auroras boreais na noite do venres para o sábado.

O momento de maior intensidade, segundo Óscar Blanco, director do Centro Astronómico de Trevinca, foi despois da media noite e ata preto das dúas da mañá aínda que se puideron ver durante máis tempo.

É unha imaxe pouco habitual nestas latitudes provocada pola maior tormenta xeomagnética das últimas dúas décadas.

O sol atópase nun momento de actividade máxima, algo que só acontece cada dez ou doce anos polo que podería repetirse este fenómeno aínda que é difícil velo con tanta intensidade.