As altas temperaturas animan a moitos bañistas a refrescarse nos areais
No interior de Galicia, algunhas zonas superaron os 35 graos
A calor abafante durará ata o mércores
Día de calor abafante en gran parte de Galicia, que nos deixou praias ateigadas de xente en lugares como Vigo. As temperaturas extremas afectaron principalmente ao interior da nosa comunidade e animaron a moitos bañistas a achegarse ata os areais.
Na costa moitos puideron esquivar a vaga de calor entre baño e baño.
"Vai moita calor, fai un día moi bo, hai moita xente, os nenos xa están todos moreniños e eu tamén", di un bañista
Hidratarse ben, poñer abundante protección solar, refrescarse a cada pouco na auga... son algúns dos consellos para soportar mellor as altas temperaturas, que superaron en varios puntos de Galicia os trinta e cinco graos.
"Son de Leiro, vai máis calor alá, hoxe haberá uns 40 graos"
"A auga está boísima, espectacular a verdade"
"Acabamos de chegar, vimos de Barcelona, aquí o tempo é espectacular", comentan outros bañistas.
Este domingo a situación vaise repetir con valores altos. As praias volverán ser para moitos o alivio á calor extrema. Prevese que as temperaturas volvan pouco a pouco á normalidade o mércores.
