Cinco días sen auga, en plena vaga de calor, nunha rúa de Lugo
As familias afectadas, con bebés e anciáns, van asearse ás casas de parentes e achegados
Un inferno en plena vaga de calor. Iso é o que están a vivir esta semana unhas quince familias da rúa Esquiu, no barrio lugués da Residencia, debido á falta de auga nas súas vivendas. Na madrugada do luns unha rotura deixounos sen servizo, e dende aquela teñen que recorrer ás casas de parentes e achegados para poder asearse. Entre os afectados, hai dende bebés a persoas de idade avanzada.
O corte de auga tratouse de resolver en varias ocasións, pero o problema persistiu debido á aparición de novas fugas. Segundo sinalan os veciños, a antigüidade das tubaxes favoreceu que rebentasen en varios puntos.
Coa incorporación dunha nova brigada por parte dunha empresa contratada polo Concello, agárdase que o servizo se restableza por completo esta fin de semana.
