Leiro marca a máxima de Galicia con 38,7 graos e a Xunta activa o nivel 1 de alerta por calor en varias zonas
Leiro marca a máxima de Galicia con 38,7 graos e a Xunta activa o nivel 1 de alerta por calor en varias zonas
Agárdanse temperaturas por riba dos 35 graos no interior entre o sábado e o luns
A Consellería de Sanidade publica recomendacións para os grupos máis vulnerables
A Xunta activou o nivel 1 de alerta por altas temperaturas en distintos puntos de Galicia debido á chegada dunha masa de aire moi cálida de orixe norteafricana, segundo informou MeteoGalicia.
As altas presións situaranse a partir deste venres ao norte da península Ibérica, o que provocará un acusado ascenso das temperaturas mínimas e máximas.
Durante este venres varios puntos da provincia de Ourense alcanzaron temperaturas por enriba dos 35 graos e en Leiro case se achegaron aos 40 graos, segundo os datos recollidos por MeteoGalicia.
No municipio de Leiro os termómetros marcaron o valor máximo na provincia e en Galicia con 38,7 graos ás 18.00 horas desta xornada.
Despois de Leiro, os termómetros alcanzaron en Ourense capital os 38,6 graos; na estación da Arnoia os 37,3 graos; e en Pantón (Lugo) o mercurio marcou os 36,7 graos.
O pico de calor, entre o sábado e o luns
As temperaturas máis elevadas agárdanse entre o sábado e o luns, cando o episodio de calor afectará practicamente todo o país, agás o norte das provincias da Coruña e Lugo.
Nas Rías Baixas, agárdanse néboas costeiras o domingo e o luns, que contribuirán a un lixeiro descenso térmico nas primeiras horas do día nas zonas litorais. Segundo as previsións, a situación comezará a mellorar a partir do mércores.
Beber sen ter sede e usar sombreiro
A Consellería de Sanidade lembra que os principais grupos de risco son:
- Persoas maiores de 65 anos
- Nenos menores de 4 anos
- Persoas con enfermidades cardiovasculares, pulmonares, renais, diabetes, párkinson, alzhéimer ou enfermidades psiquiátricas
- Persoas que vivan en vivendas mal acondicionadas
- Persoas con exceso ou baixo peso
- Traballadores, deportistas e persoas que pasen moitas horas ao aire libre
As autoridades sanitarias aconsellan:
- Beber máis líquidos, sen esperar a ter sede
- Evitar bebidas quentes, alcohólicas, café, té e bebidas moi azucradas
- Consumir máis ensaladas, verduras e froitas
- Evitar comidas copiosas, repartindo a inxesta en varias tomas ao día
- Usar roupa lixeira de tecidos naturais, sombreiros, lentes de sol e protección solar
En caso de sufrir esgotamento ou un golpe de calor, cómpre chamar con urxencia o 061.
.png)
