O Concello de Vigo garante finalmente a celebración das festas de Coia

O Concello de Vigo confirmou este venres que finalmente haberá festas no barrio de Coia.

Foi despois dunha reunión de última hora coa comisión organizadora.

A comisión anunciara xa a suspensión dos festexos pola negativa municipal a autorizar o plan de autoprotección presentado inicialmente.

“O Concello garante, xunto coa comisión, que haberá festas en Coia, e que alí estarán todas as atraccións que cumpran coas condicións de seguridade que esixe a normativa autonómica”, asegurou o voceiro municipal, Carlos López Font, nun audio remitido aos medios ao rematar o encontro.

Menos atraccións, pero sen recortar actuacións

Font insistiu en que non se instalarán atraccións que incumpran a normativa e recoñeceu que a comisión contará con “menos ingresos”. Ante esta situación, o Goberno local asumirá ese déficit económico para garantir o resto dos elementos das festas, como as orquestras ou outras actuacións previstas.

A decisión chega tras varios días de incerteza, logo de que a comisión anunciara esta semana a cancelación das festas por falta de autorización municipal ao non aprobarse o plan de seguridade inicial.