Bota a andar o xuízo polo crime do carniceiro da praza de Santiago este luns
Comeza na Audiencia Provincial a vista oral pola morte a golpes do vendedor en novembro de 2024
Está previsto que se prolongue durante toda a semana coa decaracion de 23 testemuñas e peritos
Os dous acusados enfróntanse a 16 anos de prisión cada un por homicidio e por lesións ao vixilante
O xuízo pola morte de Antonio Costa bota a andar este luns na sede compostelá da Audiencia Provincial da Coruña. Os dous acusados enfróntanse a 14 anos de cárcere cada un por un delito de homicidio, e outros dous por un delito de lesións ao vixilante.
Os feitos remóntanse á madrugada do 12 de novembro de 2024 cando a vítima se dispoñía a abrir a súa carnicería na praza de Abastos de Santiago.
O testemuño con máis valor, no que se apoia o fiscal, é o do garda de seguridade do mercado que tamén resultou ferido cando quixo axudar a vítima.
Segundo o seu relato, Antonio encarouse cos seus agresores fóra do recinto, pero a pelexa seguiu dentro, onde forcexaron. O carniceiro colleu un cepillo con pau, supostamente para se defender, pero todo virou na súa contra.
Carlos Yépez golpeouno con forza e tirouno ao chan. Cando o tiña inmobilizado, o seu compañeiro, Kevin Guillén, deulle alomenos dous golpes coa barra de ferro do cepillo que foron fatais.
Serán os integrantes do xurado popular os que determinen a responsabilidade dos dous acusados na morte de Antonio Costa.
