Arrementen contra un coche patrulla en Boiro, agriden axentes na fuxida e acaban detidos
Os dous arrestados, un home e unha muller, veciños da vila, estaban sendo investigados logo de que reactivaran un punto de venda de drogas
Efectivos da Garda Civil de Boiro detiveron dúas persoas como presuntos autores dun delito contra a saúde pública por tráfico de drogas, atentado contra axentes da autoridade e senllos delitos contra a seguridade viaria despois de que os implicados arremeteran contra o vehículo policial para eludir o alto.
A detención dun home de 56 anos e unha muller de 36, ambos veciños da localidade, permitiu desarticular un punto de venda de droga polo miúdo na vila do Barbanza.
As investigacións iniciáronse tras a reactivación deste punto de distribución por parte dos dous implicados, quen xa contaban con antecedentes por feitos similares.
Os axentes prepararon un dispositivo para poder demostrar o tráfico de drogas e poder deter os sospeitosos.
Durante unha das intervencións, os implicados acometeron contra o vehículo policial para eludir o alto e fuxiron a gran velocidade, abandonando despois o turismo nunha zona de monte próxima.
Momentos despois, os axentes interceptaron os dous sospeitosos a bordo dun segundo automóbil e detivéronos.
Na inspección incautáronse 60 doses de heroína, 31 de cocaína, 26 de haxix e 4 de marihuana listas para a súa venda, diversos útiles para a súa manipulación e máis de 1.400 euros en efectivo, constatándose así mesmo que a condutora non tiña permiso de condución.
As dilixencias instruídas, xunto cos detidos, foron postas á disposición do Xulgado de Garda de Ribeira, cuxa autoridade xudicial decretou o ingreso en prisión sen fianza para ambos os procesados.
