Arranca este luns a campaña de vacinación da gripe e da covid en Galicia
Unha das novidades deste ano é que a vacina antigripal de alta carga se amplía ás persoas de entre 65 e 69 anos
A vacinación será progresiva e realizarase mediante citación
O 13 de outubro comezará a inmunización infantil nos centros de saúde e nos centros educativos que participen no programa
Este luns arranca en Galicia a campaña de vacinación fronte á gripe a á covid. Esta primeira fase desenvolverase ata o 31 de decembro.
A Xunta reforzará a protección de persoas maiores e de nenos nesta campaña.
Deste xeito, a previsión é que este ano as persoas a partir de 65 anos reciban a vacina de alta carga -na anterior campaña era a partir dos 70 anos- e que se amplíe en 20 centros escolares -ata os 75- e en 7.500 nenos, ata os 26.500 potenciais, os alumnos de centros educativos ata 11 anos que poderán recibir a vacina intranasal.
Xunto a estas novidades, as persoas serán citadas en base á cota de enfermería e non médico, o que prevé axilizar a xestión nunha campaña para a que a Xunta adquiriu 825.000 doses.
Para ser vacinado, as persoas dos grupos diana irán recibindo un SMS, ata en dúas ocasións, e tamén poderán ser repescados mediante chamada telefónica.
As autoridades sanitarias galegas fíxanse como un dos obxectivos para esta campaña aumentar a porcentaxe de persoas vacinadas entre as mulleres embarazadas e o persoal sanitario.
A seguinte data importante no calendario desta campaña será o 13 de outubro, cando comezará a inmunización infantil tanto nos centros de saúde como nos centros educativos que participen no programa piloto.
O conselleiro de Sanidade, Antonio Gómez Caamaño, e a conselleira de Política Social e Igualdade, Fabiola García, acudirán ao acto de inicio da campaña de vacinación na residencia de maiores pública autonómica A Eiriña, en Pontevedra.
Imaxe de arquivo. (Javier Vázquez/Europa Press)
