Saen ilesos os 63 pasaxeiros do autobús calcinado na AG-53 en San Cristovo de Cea
O lume propagouse cara ao monte, aínda que xa está estabilizado
Ningún dos 63 pasaxeiros quedou ferido
O incendio dun autobús con pasaxeiros que cubría o roteiro entre Santiago e Valladolid, orixinado esta tarde na AG-53, ao seu paso por San Cristovo de Cea, propagouse cara ao monte, aínda que xa está estabilizado.
Ademais, a estrada permanece cortada polo momento entre os quilómetros 65 e 73, segundo a DXT.
Os feitos producíronse pasadas as 17:45 horas no quilómetro 70 desta estrada, situado na parroquia de Lamas.
A parte traseira do vehículo de transporte de viaxeiros comezou a arder. Ningún dos 63 pasaxeiros quedou ferido.
Os pasaxeiros atopábanse ben e esperaron á chegada dun novo autobús para continuar a súa viaxe.
A Consellería do Medio Rural rexistrou un incendio forestal na mesma parroquia ás 17:51 horas e que deu por estabilizado pouco tempo despois, ás 18:30 horas.
O incidente mobilizou a un amplo operativo de emerxencias, conformado polos Bombeiros do Carballiño, Protección Civil e a Garda Civil de Tráfico, que é responsable do corte de tráfico en sentido Ourense.
Ademais, a Xunta desprazou para a extinción do incendio forestal a tres axentes, catro brigadas, dúas motobombas, dous técnicos, dous helicópteros e dous avións.
"Levounos tempo apagar o lume, primeiro con auga para tratar de baixar a temperatura e posteriormente con escuma", relata Miguel Varela, cabo dos bombeiros do Carballiño.
"De súpeto, empezou a saír fume por detrás e varios coches avisáronnos de que tiñamos que parar e xa o condutor parou e nada máis baixar prendeu", afirma un dos pasaxeiros.
"Estamos todos moi nerviosos, moi mal", engade outra muller que viaxaba no autobús.
Imaxe cedida pola Garda Civil
