A tradición de apurar as compras á última hora, protagonista da véspera da Noiteboa
Por descoido cos agasallos ou por mercar comida fresca, moitos agardan ata o final
Son moitos os que aínda teñen compras pendentes malia que a Noiteboa xa case se nos bota enriba. As rúas son un fervedoiro de mans cargadas con bolsas, e seguirán apreciándose as présas dos que agardaron á última hora.
Parece que ninguén escapa estes días. É comprar ou pensar en comprar. "Deixando todo para o último momento, coma todos os anos. Fáltanme os meus irmáns, a miña cuñada, varios máis da familia. Entre o traballo, as festas e as ceas de empresa todos os anos me pasa o mesmo e as compras quedan para o final", di unha compradora.
"Os últimos detalles xa, que mañá é día de facer ceas". Mais non todo se compra con antelación. "Os lagostinos, as ameixas e mais a nécora. Eu iso quéroo vivo".
