Aprazan ata o 15 de xullo o desaloxo dunha nai ucraína e os seus catro fillos na Coruña
O Concello busca unha solución habitacional de emerxencia mentres a familia poderá permanecer na vivenda unha semana máis
O desaloxo dunha muller ucraína e dos seus catro fillos menores, previsto para este xoves na rúa Vicente Aleixandre da Coruña, quedou aprazado para o 15 de xullo tras un acordo entre as partes.
Segundo explicou o avogado da familia, o adiamento permitirá tramitar cos Servizos Sociais a solicitude para acceder ao sistema de emerxencia habitacional. O Concello ofreceulle unha vivenda compartida durante seis meses mentres se busca unha solución definitiva.
A muller agradeceu o apoio da cidadanía concentrada diante do inmoble e criticou que a alternativa habitacional chegase a última hora. Máis dun cento de persoas participaron na mobilización convocada pola Plataforma do Dereito á Vivenda e o Sindicato de Inquilinas da Coruña para impedir o desaloxo.
O Concello asegura que lle ofreceu distintas alternativas de aloxamento nos últimos anos e que a última proposta foi trasladada este mércores. O caso tamén xerou críticas do BNG, que reclamou unha resposta máis áxil das administracións ante este tipo de situacións.
