Prisión para dous mozos por aporofobia en Vigo: "Fixéronlle mofa, cuspíronlle e lanzáronlle moedas con forza"

Dous mozos de 20 e 21 anos foron condenados este xoves pola Audiencia Provincial de Pontevedra á pena de 6 meses de prisión e multa de 540 euros como autores dun delito de lesión da dignidade por motivos discriminatorios, en concurso cun delito contra a integridade moral, por agredir, insultar e humillar un home sen fogar que pernoitaba na vía pública en Vigo, e todo iso coa agravante de aporofobia.

Así se acordou nunha vista de conformidade celebrada na sección quinta da Audiencia de Pontevedra, con sede na cidade de Vigo, na que os dous acusados recoñeceron os feitos e se confesaron autores destes.

A agresión ocorreu a noite do 2 de marzo de 2025 nunhas galerías do barrio do Calvario. Os dous acusados, xunto con outros amigos menores de idade, decatáronse da presenza da vítima, que estaba a pernoitar ao abrigo dunhas escaleiras.

"Guiados pola intención de humillalo e denigrarlo pola súa condición de persoa sen recursos, fixéronlle mofa, cuspíronlle e lanzáronlle moedas con forza", segundo recolle o escrito de acusación da Fiscalía, que sinala que un dos acusados gravou esa humillación co seu teléfono móbil mentres os atacantes dicían: "Aquí só hai xonquis".

A vítima espertou e tratou de facerlles fronte, e nese momento o grupo saíu correndo. Con todo, un dos acusados (o que gravara co seu teléfono), antes de fuxir do lugar achegouse ao home sen fogar e propinoulle dúas puñadas na cabeza. "Estes actos supuxeron unha grave humillación da vítima, en menoscabo da súa autoestima", sinala a Fiscalía.

Por iso, considéraos autores dun delito cometido contra os dereitos fundamentais e liberdades públicas recoñecidos na Constitución Española, na súa modalidade de lesión da dignidade por motivos discriminatorios, e en concurso cun delito contra a integridade moral. Ademais, ao mozo que golpeou á vítima atribúelle tamén un delito leve de lesións.

Tras o acordo de conformidade, os dous mozos foron condenados a 6 meses de prisión e ao pago dunha multa de 540 euros, ao que se suma outra multa de 90 euros para o procesado polas lesións. Ambos deberán indemnizar conxuntamente a vítima con 1.000 euros, e o que o golpeou deberá pagarlle outros 300 euros a maiores.

A condena inclúe tamén a inhabilitación para o exercicio de calquera profesión no ámbito educativo, docente, deportivo e de lecer durante 3 anos e medio.

A pena privativa de liberdade quedou suspendida por dous anos a cambio de que os acusados non delincan nese tempo, paguen a responsabilidade civil e se sometan a un curso reeducativo e de formación no ámbito da igualdade de trato.

Con motivo da celebración desta vista, o foro socioeducativo As Ninguéns concentrouse ás portas da Cidade da Xustiza de Vigo para denunciar as agresións sufridas polas persoas en situación de rúa. Na concentración participou a deputada do BNG Alexandra Fernández.

O denunciante deste caso, Carlos Antonio, lamentou que os insultos e agresións ás persoas sen fogar son habituais e que mesmo hai situacións de violencia e roubos no albergue municipal.

A vítima, que inicialmente foi remisa a chegar a un acordo de conformidade e pediu que os acusados fosen ao cárcere, explicou que a noite dos feitos estaba a durmir na rúa porque non había praza no albergue. "Sentín que me golpeaba algo e espertei e tiña toda a cara cuspida", rememorou, e lamentou que ás veces parece máis doado tomar a xustiza pola man.