Aparecen varios roedores de gran tamaño no barrio de Freixeiro, en Narón
Veciños das vivendas sociais de Amenadás denuncian a presenza de ratos duns 30 centímetros nas rúas
Reclaman ao Concello unha maior limpeza na zona para evitar a proliferación dos animais
Os veciños do barrio de Freixeiro, en Narón, denuncian a presenza de ratas de gran tamaño preto das súas vivendas e piden ao Concello que intensifique os labores de limpeza na zona para evitar a proliferación destes roedores.
Son cincuenta familias as que se ven afectadas polos animais e residen nas chamadas vivendas sociais de Amenadás. "Agora veñen para a rúa a ver se encontran comida, eran tres, e non se inmutan de nada."
"Ten máis medo un gato ca o rato" conta Rafael, portavoz dos afectados.
Di que chegan mesmo a entrar polos sumidoiros e apunta unha parcela situada a carón do poboado de Freixeiro, a escasos metros das vivendas, onde se acumula todo o lixo.
"Andaron uns tractores limpando e moveron todo iso, pero tal como se ve está todo moi mal, segue habendo ratos".
Tamén se queixan da falta de limpeza doutras leiras lindeiras que están a monte: "Aí en fronte é de particulares; de feito, uns limpan e outros non".
E por iso reclaman maior limpeza. Porque tal como di Rafael non se limpa nada e están como abandonados.
En Freixeiro non se resignan a convivir con ratas pola rúa.
