Veciños dun barrio de ourense alertan do risco de incendio pola maleza

Os afectados son os veciños da rúa Poeta Manuel Antonio, especialmente un inmoble onde residen unhas 80 familias e que está rodeado de vexetación tanto na zona traseira como nun lateral.

A maleza invade o noiro que une este edificio coa estrada do Seminario. Din que leva anos sen limpar. A última vez foron eles mesmos, subliñan, os que tiveron que rozar as silveiras para evitar que acabaran entrando polas fiestras.

Ademais da presenza de roedores e outros bechos, esta situación preocúpalles pola risco de incendio. Temen que se hai un lume acabe afectando as súas vivendas.

Xa presentaron varias reclamacións, afirman, pero todo segue igual. Atribúen a discrepancias sobre a titularidade dos terreos ou ao descoñecemento o feito de que a zona siga sen limpar.