Albania acepta extraditar un detido vinculado con 82 quilos de cocaína intervidos no porto de Vigo
A Policía Estatal de Albania informou a principios de maio do seu arresto
A droga chegara nun contedor procedente de Ecuador, e os responsables do alixo foron capturados cando tentaban sacala ro recinto portuario
As autoridades albanesas aceptaron a extradición a España de Klevi K., un cidadán que foi detido nese país hai un mes en virtude dunha orde europea de captura, tramitada a pedimento do tribunal de instancia de Vigo, sección de instrución, praza 2, e ao que se vincula cun cargamento de 82 quilos de cocaína intervido no porto da Cidade Olívica en febreiro pasado.
Segundo informaron fontes xudiciais, tras a detención, o país balcánico aceptou a entrega do home, de 30 anos de idade e de nacionalidade albanesa, pero a extradición aínda non se executou e non foi posto ao dispor das autoridades españolas.
A Policía Estatal de Albania informou a principios de maio do seu arresto, pola súa relación cunha partida de cocaína localizada en varios paquetes, ocultos no sistema de refrixeración dun contedor que chegou ao porto de Vigo procedente de Ecuador.
Tentaron retirar a droga do recinto portuario
A investigación levada a cabo en España por Vixilancia Aduaneira e Garda Civil vinculou ese cargamento cunha organización criminal albanesa, e varios dos seus membros atopábanse na Cidade Olívica cando chegou a droga, coa intención de retirala do recinto portuario.
Na madrugada do 15 de febreiro, dous individuos intentaron acceder á terminal para 'rescatar' a cocaína, pero foron interceptados polas forzas de seguridade e detidos.
No operativo interviñéronse un total de 61 paquetes de cocaína (nunha revisión posterior localizáronse outros nove paquetes), catro bolsas de deporte de gran tamaño, unha escaleira encartable, un trade, bridas, dous teléfonos e un vehículo.
Pero os investigadores seguían a pista de máis implicados, un deles Klevi K. que, finalmente, foi detido hai unhas semanas na súa localidade natal, Vlora (Albania). Fontes policiais albanesas confirmaron que a detención foi resultado do intercambio de información policial a través de Interpol, con base nunha orde de captura internacional datada en marzo deste ano, por un suposto delito de tráfico de drogas.
As mesmas fontes apuntaron que o sospeitoso está vinculado coa entrada a España deses 82,84 quilos de cocaína escondida nun contedor, e que a súa función era a de vixiar o devandito contedor desde fóra da terminal portuaria. Tras fuxir de Vigo, o sospeitoso dirixiuse a Cataluña e, desde alí, a Italia, antes de regresar á súa localidade natal, onde foi arrestado.
