Adeus a Conchita Teijeiro, presidenta de Aspnais en Lugo durante máis de catro décadas

A asociación de pais ou titores de persoas con discapacidade intelectual de Lugo comunicou o pasamento de María Concepción Teijeiro de Pardo Ouro. Conchita Teijeiro, como era coñecida, foi presidenta da organización desde 1972 ata 2013, e contribuíu a mellorar as condicións das persoas con discapacidade intelectual.

"Aspnais nomeouna presidenta de honra, e diante do noso edificio social – antigo hospital de San José –, unha estatua en bronce, obra do artista pontevedrés José Molares, recórdaa abrazando un neno anónimo que representa a todos os usuarios do noso colectivo", aseguraba o presidente de Aspnais, José Reigosa.

Conchita Teijeiro recibiu en 2003 a medalla Castelao, e en 2018 a Medalla de Ouro da cidade de Lugo como recoñecemento ao seu labor a prol da visibilización das persoas con discapacidade. Aspnais constituíuse o 8 de xaneiro de 1966 e ela foi unha das súas fundadoras e "pedra angular" da organización como recoñeceu o seu presidente. O obxectivo primordial desta asociación desde a súa creación foi integrar social, educativa e laboralmente as persoas deste colectivo.

Será enterrada na intimidade familiar. O domingo ao mediodía oficiarase unha misa no tanatorio de Velatorios Lucenses e o luns celebrarase o funeral ás seis da tarde na igrexa de San Pedro.