Verán complicado para as academias sen os exames de setembro

"Agora mesmo pois temos un 20 ou 30 por cento con respecto a veráns pasados".

 "Non chegan a ser catro meses enteiros, pero son case catro meses sen actividade, a ver para unha persoa que está empezando isto é terrible, terrible".

 "Haberá que gañar en inverno para todo o verán", opinan dende as academias de ensino.

Está sendo un verán moi duro para as academias de ensino. Sen os exames de setembro, moitas decidiron pechar a porta.

 "Levabamos moitos anos sen pechar nunca, pois decidimos pechar e os traballadores son fixos descontinuos e entón foron ao paro", apunta  Mª José Piñeiro, directora dunha academia de ensino.

Noutras alternaron as vacacións con actividade, pero moi reducida.

"Esta academia decidiu pechar durante o mes de xullo e agora no mes de agosto volvemos pouquiño a pouquiño", explica Manuel Brea, mestre nunha academia.

 "Eu pasei de traballar todos os días pola mañá a traballar só dous días hora e media", comenta Rafael Aboal, director dunha academia de ensino.

Moitas delas xa viñan notando unha redución da actividade nos últimos veráns.

"Cando a universidade quitou os exames de setembro, despois pasou cando quitaron os de segundo de bacharelato e agora este ano xa hai moi poucos alumnos, só veñen os rapaces que queren preparar un pouco o ano que vén e por exemplo a UNED que aínda ten exames de setembro", continúa Rafael.  

Esta última reforma educativa non gusta moito e teñen medo de que lle pase factura a un alumnado que xa perdeu moito nivel durante a pandemia.

 "É  o primeiro ano e imos ver como chegan, pero coido que vai ser complicado, que vai ser complicado", augura María José Piñeiro.