A xustiza europea cre insuficiente que España converta os interinos en indefinidos non fixos

O Tribunal de Xustiza da Unión Europea (TXUE) ditaminou este martes que a práctica en España de converter en indefinidos non fixos os interinos que encadearon contratos temporais coa Administración non é unha medida suficiente para sancionar os abusos, porque "supón manter unha relación laboral temporal" e a situación de "precariedade" do traballador.

En concreto, a corte de Luxemburgo sinala que o Dereito comunitario se opón a esta transformación da relación laboral en indefinida non fixa, no sentido de que "non constitúe unha medida adecuada para sancionar debidamente os abusos".

Ademais, os xuíces europeos sinalan que o pagamento dunha indemnización ao traballador cando finaliza a relación laboral, o réxime de responsabilidade das Administracións Públicas e a convocatoria de procesos selectivos para cubrir as prazas tendo en conta a experiencia anterior do traballador tampouco "parecen sancionar debidamente esta utilización abusiva nin eliminar as consecuencias do incumprimento do Dereito da Unión".

O TXUE responde así as preguntas formuladas polo Tribunal Supremo, que buscaba claridade por parte da Xustiza europea para dilucidar se era obrigatorio para España converter os interinos en traballadores fixos para emendar unha situación de abuso polo encadeamento de contratos temporais.

Dáse o caso de que España ten uns 627 millóns de euros do fondo de recuperación bloqueados despois precisamente de que dúas sentenzas do TXUE emitidas en febreiro e xullo de 2024 xa ditaminaran que non conta con medidas efectivas para sancionar a concatenación abusiva de contratos temporais coa Administración pública.

Nesta ocasión, o Supremo recorreu á Xustiza europea antes de resolver o caso dunha traballadora que encadeou desde marzo de 2016 un total de seis contratos de interinidade como coidadora de nenos nun centro educativo público da Comunidade Autónoma de Madrid.

Esta traballadora denunciou a súa situación e reclamou que a súa relación laboral fose declarada fixa para compensar os abusos derivados desta sucesión de contratos temporais, pero o xulgado de primeira instancia optou por declarala como indefinida non fixa, cualificación que supón unha indemnización de 20 días por ano traballado cun límite de 12 mensualidades unha vez se extinga a relación laboral.

A causa chegou ao Tribunal Supremo, instancia que elevou a cuestión ao TXUE para que a xustiza europea "disipe as dúbidas" que existen ao respecto "á vista da interpretación e aplicación diverxente" que están a facer os tribunais españois ao valorar casos similares.

No ditame publicado este martes, o TXUE non se pronuncia sobre se España está obrigada a converter aos interinos en fixos, pero explica que a conversión en indefinidos non fixos "non constitúe unha medida adecuada para sancionar debidamente os abusos", posto que "supón manter unha relación laboral de natureza temporal e, por tanto, a situación de precariedade do traballador afectado".

Ao mesmo tempo, expón que "non parece" que a indemnización con "dobre límite" que se aplica no caso de traballadores indefinidos non fixos "poidan eliminar as consecuencias do incumprimento do Dereito da Unión en todas as situacións de utilización abusiva de sucesivos contratos de duración determinada".

Con respecto ao réxime de responsabilidade da Administración, a sentenza apunta que tampouco constitúe unha medida adecuada debido ao seu "carácter ambiguo, abstracto e imprevisible" e ao feito de que "non vai acompañado doutras medidas efectivas, disuasorias e proporcionadas".

Para rematar, o Tribunal de Xustiza avalía os procesos selectivos para cubrir prazas na Administración e conclúe que, aínda que valoran a experiencia previa do traballador e o tempo de servizo, non se limitan a "aqueles candidatos que fosen vítimas dos abusos", polo que "tampouco constitúen unha medida adecuada".

Sobre este punto, sinala que é posible que as vítimas dos abusos "non participen no proceso selectivo ou que non o superen", así como que a valoración da experiencia e do tempo de servizo "parece favorecer todos os traballadores temporais que teñan esa experiencia, incluídos os que non padecesen o abuso". 

O Goberno sinala que a sentenza non obriga a facer fixos os interinos

O Ministerio para a Transformación Dixital e da Función Pública defendeu este martes que a sentenza do Tribunal de Xustiza da Unión Europea non obriga a España a facer fixos os contratos temporais do sector público.

"O TXUE o que dixo é que España ten que facer máis para evitar abusar da figura do traballador temporal, pero non obriga a facelo dun xeito ou outro", sinalan nunha nota remitida aos medios.

"A sentenza do TXUE, coñecida hoxe, é meramente aclaratoria: non afecta a normativa nacional nin impón sanción de ningún tipo", inciden.

O Tribunal de Xustiza da Unión Europea aclarou, engade Función Pública, que o acordo marco (directiva europea) non impón aos Estados membro unha obrigación xeral de transformar en contratos por tempo indefinido os contratos temporais.

"Ante este ditame o Goberno de España reitera o seu firme compromiso coa redución da temporalidade entre os empregados da Administración pública e lembra que a doutrina do Tribunal Constitucional é contraria a facer fixos a traballadores temporais sen que saquen esta praza nunha oposición aberta a todo o mundo", conclúen.