Sanidade restablece este mércores o servizo en todos os centros de saúde de Ourense

A Xunta de Galicia anunciou que este mércores quedará restablecida a asistencia sanitaria en todos os centros de saúde da provincia de Ourense, despois de que os incendios forestais afectasen á rede eléctrica e ás comunicacións.

A Consellería de Sanidade explicou que se despregaron catorce antenas satélite e ata 80 quilómetros de fibra óptica para garantir as comunicacións, o que permitirá recuperar a plena normalidade. Sanidade destacou que durante estes días todos os centros permaneceron abertos, aínda que se reorganizou a atención nas cabeceiras comarcais para facilitar o acceso ás aplicacións do Sergas, como a historia clínica ou a receita electrónica.

Entre os traballos realizados instaláronse antenas satélite en hospitais públicos como os de Valdeorras e Verín, así como nos centros de saúde de Trives, Verín, Viana do Bolo, A Rúa, O Barco, Vilardevós, A Mezquita, Ribadavia, A Veiga, Laza, Larouco e Manzaneda. Ademais, un operativo de 57 persoas de Telefónica, coordinado pola Xunta, restableceu os servizos despois de que o lume destruíse a fibra óptica que transporta datos e dá conexión a Internet e telefonía aos centros sanitarios, así como centrais de 5G que ofrecían cobertura cidadá e soporte auxiliar.

Mobilizáronse tamén catro unidades móbiles para reforzar a cobertura das redes de telefonía móbil nas zonas máis afectadas, despregáronse máis de 80 quilómetros de fibra polas beiras de estradas, montes e rede ferroviaria e activáronse cinco unidades para dar conectividade satelital a estacións base incomunicadas.

Catro grupos electróxenos móbiles permitiron garantir a estabilidade das centrais e evitar interrupcións no servizo, consolidando así a recuperación da rede sanitaria tras a emerxencia provocada polos incendios.