A Xunta recomenda pechar a praia de Remior en Barreiros despois dunha vertedura

A Consellería de Medio Ambiente e Cambio Climático remitiu este martes un escrito ao Concello de Barreiros (Lugo) tras detectar unha vertedura de augas residuais na praia de Remior, que afecta unha parte do areal incluída na rede Natura 2000.

No documento, a Xunta insta o Goberno municipal a actuar "coa maior urxencia" para garantir a seguridade das persoas usuarias da praia.

Axentes ambientais desprazáronse ao areal logo de ter coñecemento da vertedura sen tratar, que, segundo recolle o informe de Medio Ambiente, forma unha lagoa "composta principalmente por augas residuais" e impacta en hábitats e especies da zona.

Os técnicos da consellería recolleron mostras da auga e da fauna afectada para a súa análise. Como medida preventiva, a Xunta recomenda pechar temporalmente a praia para evitar o baño mentres non se coñecen os resultados.

O Goberno galego lembra que o tratamento e evacuación de augas residuais é competencia municipal, e advirte de que esta vertedura podería supoñer unha infracción administrativa segundo a Lei do Patrimonio Natural de Galicia e a normativa estatal vixente.