A Xunta inviste 72,8 millóns de euros na ampliación do CHUS
Tamén acordou destinar 6,5 millóns de euros á adquisición de nove equipos que permiten diagnóstico precoz de múltiples tipos de enfermidades
A Xunta de Galicia acordou na súa reunión semanal deste xoves, a primeira tras as vacacións de verán, contratar por 72,8 millóns de euros as obras de ampliación do Complexo Hospitalario Universitario de Santiago (CHUS).
Estas obras permitirán ampliar en máis dun 30 % a superficie actual do centro hospitalario e a previsión é que se liciten este mesmo mes de setembro para poder empezar os traballos no primeiro semestre do ano que vén, informou o presidente galego, Alfonso Rueda, na súa comparecencia tras o Consello da Xunta.
A ampliación do CHUS supón construír unha nova zona de Urxencias Pediátricas e ampliar a de Urxencias actual, así como un novo bloque cirúrxico cun 50 % máis de quirófanos, a creación dun hospital de día para diferentes especialidades, e converter todos os cuartos do centro en dobres ou individuais, polo que non quedará ningunha tripla.
Fondos para equipos
No ámbito sanitario, o Goberno galego tamén acordou destinar 6,5 millóns de euros á adquisición de nove equipos gammacámara SPECT-TC, que permiten diagnóstico precoz de múltiples tipos de enfermidades e úsanse no tratamento do cancro, e irán destinados aos complexos hospitalarios de Lugo, Ourense, Santiago, o Meixoeiro de Vigo e o Montecelo de Pontevedra.
