Médicos reclaman nunha marcha en Santiago a dimisión da ministra Mónica García

Médicos e facultativos de distintos puntos de Galicia protagonizaron este mércores unha manifestación por Santiago de Compostela para reclamar un estatuto propio por parte do ministerio e un convenio específico na sanidade galega, no que cualificaron de "unha defensa total e absoluta da sanidade pública" que non cesarán ata que consigan as súas reclamacións: "Seguiremos ata o final".

Así o explicou, en declaracións aos medios, Mercedes Tallón, vicepresidenta de O'Mega e membro do comité de folga, tanto autonómico como nacional, que engadiu que as súas reivindicacións "son necesarias" tanto para eles como para os seus pacientes.

A protesta estaba convocada por O'Mega, a Agrupación de Profesionais por un Estatuto Médico Propio, Médicos Unidos polos seus Dereitos e a Asociación MIR España. Partiu preto das 19.00 horas da Alameda de Santiago e percorreu varias rúas da cidade, parando ante o Parlamento de Galicia, ata a Praza de Praterías.

Nun ambiente festivo e portando globos laranxas, verdes e azuis, os manifestantes gritaron consignas como 'Paciente, escoita, esta é a túa loita' ou 'Vaia malos tratos, o estatuto marco', e pediron a dimisión da ministra Mónica García.

Antes de comezar, Mercedes Tallón lembrou que a mobilización do colectivo ten unha dobre vertente, por unha banda a reclamación ao Ministerio de Sanidade de "un estatuto propio para médicos e facultativos" e, por outro, a esixencia ao Sergas de "melloras a nivel laboral".

Unha xuntanza produtiva co Sergas

De feito, na mañá deste mesmo mércores tiña lugar unha reunión entre o Sergas e representantes do comité de folga que foi, en palabras de Mercedes Tallón, "boa" e "produtiva" e na que se "intentou chegar a acordos".

"Aínda estamos aí. Achegámonos nalgúns temas, noutros aínda seguimos moi separados e hai un compromiso, tanto por parte deles como pola nosa banda, de seguir aí e intentar resolver algo", explicou a representante de O'Mega.

Entre as esixencias de base desta negociación está "a posibilidade de ter un ámbito de negociación propia tamén aquí a nivel autonómico", o "establecer unha xornada máxima tanto anual como semanal" e "o terminar con esas gardas interminables de 24 horas que supoñen un custo tremendo a nivel privado e de mala praxe para a atención á poboación", explicou Tallón.

"Temos moi claro que isto non o imos a parar, que temos uns obxectivos clarísimos, que cremos que son necesarios tanto para nós como para os nosos pacientes", ratificou Mercedes Tallón, que garantiu que seguirán "negociando" e "pelexando" por conseguir as súas esixencias.