A Xunta incorpora 1.012 novos funcionarios docentes, 401 deles de infantil e primaria

A Xunta incorporou este curso ao sistema educativo público galego a 1.012 novos funcionarios docentes, cunha idade media de 32,4 anos, dos que 401 son mestres de Educación Infantil e Primaria, 573 profesores de secundaria e 38 de sectores singulares de Formación Profesional, tras as oposicións celebradas este verán na quenda de ingreso libre.

Os novos docentes incorporáronse aos seus respectivos centros o pasado 1 de setembro e están repartidos por 194 municipios galegos. O conselleiro de Educación, Ciencia, Universidades e FP, Román Rodríguez, deulles este xoves a benvida nun acto celebrado na Cidade da Cultura, en que participaron os mestres de infantil e primaria, mentres que mañá será a quenda dos profesores de secundaria e FP.

Máis de 10.000 persoas concorreron ao proceso selectivo do que saíron estas novas incorporacións, segundo explicou Rodríguez, quen destacou o "longo proceso de traballo e esforzo" necesario para obter unha praza.

O 70 % dos novos funcionarios en prácticas son mulleres, un total de 708, fronte a 304 homes. Entre os mestres, as especialidades con máis incorporacións son Educación Primaria, con 105 prazas; Pedagoxía Terapéutica, con 81; Educación Infantil, con 69; Inglés, con 38; e Audición e Linguaxe, con 35.

En secundaria, as especialidades con máis novos profesores son Inglés, con 78; Lingua e Literatura Galega, con 69; Lingua Castelá e Literatura, con 30; Xeografía e Historia, con 29; e Matemáticas, con 28. Nos sectores singulares de FP destacan Cociña e Pastelería e Mantemento de Vehículos, con once incorporacións cada unha.

Os novos funcionarios teñen entre os principais retos o de incorporarse a unhas aulas que, segundo Rodríguez, presentan unha "crecente diversidade".

O conselleiro destacou ademais as medidas adoptadas pola Xunta para reducir as cocientes e mellorar as condicións do profesorado e sinalou que o cociente máximo en infantil sitúase este curso en 20 alumnos por aula, unha medida que se estenderá a primaria o próximo curso.

Ademais mencionou a posta en marcha "de inmediato" dunha Oficina de Apoio ao Profesorado, que ofrecerá acompañamento e asesoramento aos docentes ante posibles ameazas ou agresións físicas, verbais ou no ámbito dixital.

Tamén reivindicou a próxima Lei de Educación Dixital como unha ferramenta para regular o uso da tecnoloxía e da intelixencia artificial nas aulas.

Sobre o inicio de curso, Rodríguez admitiu que as primeiras semanas xeran "certa tensión" tanto nas familias como no profesorado, aínda que defendeu que o sistema educativo galego funciona "con moitísima normalidade".

En canto ás protestas sindicais, atribuíu as mobilizacións á estratexia de confrontación dun sindicato "da órbita nacionalista", en referencia á CIG, e asegurou que a maioría das organizacións sindicais e do sistema educativo traballan dentro dun marco de estabilidade.

Entre os nervios da estrea e a ilusión por empezar

Para algúns dos novos funcionarios o inicio desta etapa chega acompañado de nervios e da necesidade de afrontar situacións descoñecidas.

Miguel, de 25 anos e natural de Vimianzo (A Coruña), estréase no seu municipio en Educación Infantil cunha clase de nenos e nenas de cinco anos, e recoñece estar "un pouco asustado", aínda que con ganas de empezar.

Para o seu primeiro día propón coñecer os intereses e emocións dos alumnos e observar como se relacionan entre eles antes de comezar a traballar.

Doutra banda, Judith, de 25 anos e natural de Ponteareas (Pontevedra) comeza a súa traxectoria docente en Cambados. Aínda que aprobou as oposicións por Audición e Linguaxe, este curso "por circunstancias excepcionais" exercerá como apoio en Infantil, un ámbito no que nunca traballara.

"Para min supón un reto moi grande", contou a EFE a profesora, que a pesar do "medo inicial" ten "moitas ganas" de comezar e xa empezou a estudar o currículo da etapa educativa, en que recibiu "moito apoio" do centro.

A Lucas, de 34 anos, destinárono a Bande (Ourense) e a partir deste ano é funcionario de Pedagoxía Terapéutica. Tras sete anos de experiencia, reivindica a importancia de seguir reforzando a atención á diversidade e do traballo coordinado entre especialistas e titores para responder as necesidades de cada alumno.

Por outra banda, tamén hai profesores que contan con experiencia, dado que levan anos realizando interinidades e substitucións, como é o caso de Cristina, de 43 anos, profesora de Educación Física, que tras sacar a praza impartirá clase en Trives (Ourense).

Entre os profesores presentes no acto deste xoves estaba tamén Ofelia Novo, de 36 anos, a docente que logrou a mellor cualificación do proceso, un 8,45, e que comezará nunha aula de Infantil de nenos tres anos no CEIP Albeiros (Lugo).

Sinalou que desde "moi pequena" tivo "moita vocación" e gustáballe moito "ensinar aos demais", polo que o seu futuro sempre o viu "moi claro". "Espero facelo con moita responsabilidade e ilusión. Xa traballara antes como profe, pero cando estás a substituír non tes tanta continuidade e agora xa podo desenvolver un proceso educativo máis estable".