A Xunta constata un aumento das mandas de lobos e pide equilibrar economía e biodiversidade

A conselleira de Medio Ambiente da Xunta, Ánxeles Vázquez, sinalou este mércores un aumento de mandas de lobos en Galicia, a segunda comunidade con máis grupos, e reclamou equilibrio entre economía e biodiversidade.

Nun acto en Curtis, Vázquez respondeu sobre a situación do lobo, tras actualizar a normativa de caza e engadir este animal dentro das especies das que se permite autorizar "esperas, batidas e monterías" tras "danos constatados", excepto en abril, maio e xuño.

"Teñen que primar os estudos científicos e técnicos sobre a ideoloxía, cando prima a ideoloxía hai un problema", expresou a conselleira.

A Xunta acaba de enviar ao Ministerio para a Transición Ecolóxica os datos do período 2021-2024, nos que constata un aumento ata as 93 mandas -83 exclusivas e 10 compartidas con outros territorios-, por encima das 84 que había en 2014 -77 exclusivas e 7 compartidas-.

Segundo Vázquez, o lobo está nun 90 % do territorio da comunidade, que, á súa vez, é o segundo territorio con máis grupos, só por baixo de Castela e León (193) e con máis do dobre que a seguinte, Asturias (45).

"Eses datos logo teñen que ir a Europa. Imos estar moi vixiantes de que non se terxiversen", expresou, pois defendeu que a última vez foi cando logo situouse ao lobo en situación de especie ameazada, o que cre que non se produce.

Aclarou que, na actualidade, cando se solicita unha batida de lobo "faise un estudo rigoroso" para determinar se se autoriza. En todo caso, demandou respectar o "equilibrio fundamental e primordial que ten que entender todo o mundo", que é protexer aos gandeiros, a economía e a biodiversidade.

Un centro para cans e gatos dará servizo a toda Galicia desde Curtis

Un centro de protección animal, pensado especialmente para cans e gatos, dará servizo a todos os municipios galegos de menos de 5.000 habitantes desde Curtis. Anunciouno a conselleira de Medio Ambiente nunha visita á parcela de 24.000 metros cadrados cedida polo Concello para este fin.

Contará cun investimento de 2 millóns de euros e terá capacidade para 300 cans e 200 gatos, en 2.300 metros cadrados. Haberá áreas para corentena, maternidade, illamento infeccioso, hospitalización, animais agresivos ou mantemento habitual de exemplares, xunto cun módulo veterinario con consulta específica de gatos e de cans, sala de hixiene, un quirófano e unha sala de radioloxía, ademais dunha área administrativa.

Vázquez desvelou que as protectoras galegas están "desbordadas" con máis de 500 cans e 15.000 gatos neste momento. Apelou á "conciencia" da poboación para promover adopcións, que ademais agora contan cunha liña de axudas específica de 150 euros para cans e 125 para gatos.