O Defensor do Pobo recorre ao Constitucional pola redución da protección do lobo

O Defensor do Pobo presentou un recurso de inconstitucionalidade ante o Tribunal Constitucional contra a redución da protección especial do lobo, que na práctica permitiría retomar a súa caza en España.

Segundo informou a institución, o recurso foi presentado o pasado martes 1 de xullo tras recibir 278 solicitudes cidadás que instaban a actuar contra a nova normativa.

Modificacións introducidas na lei contra o desperdicio alimentario

O recurso céntrase en tres disposicións concretas da Lei 1/2025, do 1 de abril, de Prevención das Perdas e o Desperdicio Alimentario: a disposición adicional oitava, a disposición transitoria única e a disposición final décimo novena. Estas foron introducidas como emendas por varios grupos parlamentarios e afectan á vixencia da protección do lobo.

O Defensor do Pobo advertiu que o lobo é unha especie protexida pola Lei 42/2007, do 3 de decembro, do Patrimonio Natural e da Biodiversidade, e que está incluído no Listado de Especies Silvestres en Réxime de Protección Especial (LESPRE).

Posible vulneración de dereitos constitucionais

Tras analizar as peticións recibidas, a institución considera que as disposicións mencionadas poderían vulnerar o artigo 45 da Constitución, que recoñece o dereito ao medio ambiente, e o artigo 24.1, que garante o dereito á tutela xudicial efectiva.