Activan o protocolo ante a posible chegada a Galicia de calixe africana
Advirte de que a calidade do aire pode empeorar este xoves en determinadas zonas da provincia de Lugo e de Ourense
Calixe de po sahariano sobre a cidade de Santiago. Arquivo. Europa Press
A Dirección Xeral de Saúde Pública activou o protocolo de actuación ante a posible chegada a Galicia de partículas en suspensión procedentes do norte de África.
De acordo cos modelos preditivos da Consellería de Medio Ambiente e Cambio Climático, isto pode provocar que en determinadas zonas de Galicia (sobre todo na provincia de Ourense e Lugo) a calidade do aire empeore polo aumento das concentracións de partículas en suspensión.
Por este motivo, e para reducir o seu posible impacto na saúde, o departamento de Saúde Pública recomenda, ata que este episodio finalice, limitar as actividades ao aire libre, como o exercicio intenso. Tamén recomenda pechar as portas e xanelas para evitar a entrada de po nos domicilios e usar máscaras e lentes en exteriores.
A poboación que pode verse máis afectada pola mala calidade do aire, debido á elevación das partículas en suspensión, son as persoas con enfermidades pulmonares ou cardiocirculatorias, principalmente asma ou EPOC, os anciáns, nenos e embarazadas.
A situación actual e a localización dentro da xeografía galega do nivel e tamaño da partículas, así como a predición da posible chegada nos próximos días pódese consultar na páxina web de Meteogalicia.
