A Xunta aborda o absentismo como "ausencias do traballo evitables" e espera acordos pronto
O conselleiro de Emprego, José González, prefire falar de "ausencias" no traballo en lugar de "absentismo" porque di que este último termo da lugar a confusión
González confía en que patronal e sindicatos en Galicia cheguen pronto a un acordo sobre este tema
A Xunta aborda o problema do absentismo laboral como aquelas "ausencias do traballo evitables" e confía en que o diálogo social dea "resultados pronto".
Así o indicou o conselleiro de Emprego, José González, este mércores aos xornalistas nunha visita ao Centro Integrado de Formación Profesional (CIFP) do barrio de Coia, en Vigo.
"Eu non vou falar de absentismo, porque creo que é o termo que máis confunde; creo que é máis importante tratar de reducir as ausencias de traballo evitables, con todo o que ten que ver coa mellora do benestar laboral, da xestión das incapacidades temporais por continxencias comúns, ou evitar abusos", precisou González.
O conselleiro defendeu o "traballo extraordinario" que se está realizando no marco do diálogo social co sindicato UXT e a Confederación de Empresarios de Galicia e afirmou que espera "resultados pronto".
Maior flexibilidade nos fondos de formación
González pediu ao Goberno central que deixe unha "maior flexibilidade" nos fondos de formación para poder impulsar unha experiencia piloto de microformacións con agrupacións industriais sectoriais galegas, que na actualidade non permite o marco vixente, segundo advertiu.
O conselleiro lembrou que este é un ámbito no que Galicia conta coa experiencia da iniciativa das formacións de carácter non formal que está financiada con fondos do Mecanismo de Recuperación e Resiliencia.
González destacou o "potencial" do Centro Integrado de Formación Profesional de Coia na formación flexible e á carta do mercado laboral en sectores estratéxicos como a automoción e outras áreas relacionadas coa tecnoloxía industrial.
60 persoas formándose no centro vigués de Coia
Neste centro vigués están a levarse a cabo seis accións formativas dirixidas prioritariamente a persoas desempregadas (AFD) sobre a instalación e mantemento, electricidade e electrónica e fabricación mecánica nas que participan case 60 persoas.
O conselleiro lembrou que ata o 30 de novembro está aberto o prazo de presentación de solicitudes dos apoios autonómicos ás AFD.
Ata o de agora concedéronse achegas a máis dun milleiro de accións formativas destinadas a preto de 17.000 persoas, precisou.
