A xuíza reabre a investigación pola morte do dono de Mango

Unha xuíza de Martorell (Barcelona) reabriu a investigación pola morte do empresario Isak Andic, propietario da cadea de moda Mango, que os Mossos d'Esquadra apuntaron que foi accidental ao caer desde 150 metros de altura nunha excursión en Collbató (Barcelona) en decembro pasado.

Segundo xudiciais e próximas ao caso, a titular do Xulgado de Instrución número 5 de Martorell, que en xaneiro pasado acordou o sobresemento provisional das dilixencias, ao non ver indicios de delito, acordou reabrir o caso.

A maxistrada arquivou provisionalmente en xaneiro pasado as dilixencias tras recibir o informe dos Mossos d'Esquadra sobre o falecemento, que apuntaban a unha morte accidental, e os resultados da autopsia practicada ao cadáver e tomar declaración a testemuñas e familiares do empresario falecido.

Os Mossos concluíron que Andic, que saíra de excursión co seu fillo maior para facer unha ruta polas covas de salitre de Collbató, escorregou nun dos carreiros e caeu ao baleiro desde uns 150 metros de altura, o que lle provocou a morte, aínda que seguiron facendo xestións sobre o caso.

De feito, as fontes consultadas detallaron que non é infrecuente que en ocasións en casos parecidos, tras un arquivo provisional, o xulgado reabra a causa para incorporar ampliacións de atestados policiais ou mesmo os resultados das probas toxicolóxicas, que requiren de máis tempo que as autopsias.

Isak Andik Ermay -máximo accionista da cadea de moda Mango e presidente non executivo- naceu en 1953 en Istambul (Turquía), no seo dunha familia xudía de orixe sefardí, e trasladouse a Cataluña aos 14 anos, onde empezou a desenvolver a súa capacidade innata para o comercio.

Aos dezasete anos xa vendía roupa e calzado polos mercados e máis tarde abriu varias tendas de roupa vaqueira e fixo incursións na moda de tempada.

Corenta anos despois de abrir aquela primeira tenda, Andic situouse no posto número 5 da lista Forbes das maiores fortunas de España, cun patrimonio estimado de 4.500 millóns de euros.

Andic controlaba os seus negocios a través dun holding no que tamén figuran os seus tres fillos: Jonathan, Judith e Sarah.