O regreso máis especial de Iker Losada a Balaídos: "Temos un equipazo"
O de Catoira pasou polos micrófonos da Radio Galega uns días antes de xogar como local co Celta contra o seu exequipo, o Betis
"Vai ser un partido de moitas emocións, con moitos amigos nos dous lados"
"No verán, que pase o que teña que pasar", dixo Losada
Iker Losada está de volta. O xogador de Catoira debutou contra o Valencia, pero o día máis especial será aquel en que se vista coa celeste en Balaídos. Curiosamente, o primeiro rival que terá será o Betis, o equipo a que pertencía ata o de agora: "Vai ser un partido de moitas emocións, con moitos amigos nos dous lados", asegurou Losada nos micrófonos de Ao contraataque. No programa da Radio Galega non quixo adiantar o que vai pasar no seu futuro e dixo que no verán pase o que teña que pasar, sobre as posibilidades de seguir vinculado ao Celta.
O centrocampista do Celta comentou o equipo que atopou no seu regreso a Vigo: "Hai un equipazo", dixo. Sobre os obxectivos, Iker losada ten claro que hai que ter a tranquilidade de non estar no descenso. "Temos catro puntos de vantaxe e non hai que remontar nada".
