A verbena dunha parroquia de Amoeiro remata en batalla campal

O 40 aniversario das festas da parroquia de Bóveda, en Amoeiro, converteuse o sábado nunha batalla campal. Unha pelexa multitudinaria con paus, cadeiras e a patadas deixou varios feridos leves.

Sospeitan que a pelexa comezou entre dous mozos aos que escoitaron berrar no medio da actuación musical. O problema agrandouse cando un deles pediu reforzos e chegou un coche con homes armados con paus, que batían presuntamente na xente que atopaban polo camiño e que non tiña que ver coa liorta.

Antes de que chegase a Garda Civil, os presuntos agresores xa se dispersaran. A comisión de festas viuse na obriga de parar a verbena.

Varias persoas foron feridas, pero sen gravidade, e polo momento non hai presentada ningunha denuncia na Garda Civil.