A UXT e CCOO advirten de que non haberá paz social se non soben os salarios

A vicepresidenta, Nadia Calviño e varios ministros do Goberno sentan este mércores á tarde cos axentes sociais na busca dun pacto de rendas ante unha inflación que está en niveis máximos. Os sindicatos advirten de que ese pacto non pode ser á custa dos salarios.

Esta mañá, a UXT e Comisións Obreiras manifestáronse ante a sede da CEOE cunha advertencia: ou soben os salarios ou haberá conflito. Esixen que os convenios garantan o poder adquisitivo dos traballadores.

Coa inflación en máximos piden para este ano unha suba mínima do 3,5 %. De momento, a UXT e Comisións Obreiras están na fase de reivindicación, pero xa auguran un outono quente.

Diante da sede da patronal pedíronlle que sente a negociar. Mensaxe que deixan para o Goberno, se quere pacto de rendas que poña sobre a mesa medidas valentes.

Tamén houbo concentracións en Galicia, na Coruña e en Vigo, diante das sedes das organizacións empresarais. Os sindicatos poñen o foco na negociación colectiva e denuncian que unha gran maioría das empresas teñen beneficios por riba do 6 %. Reclaman un reparto xusto para que non sexa a clase traballadora a que pague esta crise. 

A estratexia sindical céntrase en "tensionar a negociación" en palabras do secretario xeral de CCOO, Unai Sordo, á vista de que a conflitividade está a servir para pechar acordos salariais "importantes" como os do metal en Cantabria ou A Coruña, onde despois de varios días de folga lográronse incrementos por encima do 4 % con cláusulas de garantía salarial.

Se isto é "perfectamente posible" en sectores que exportan e compiten no exterior, "por que non é posible chegar a un grande acordo salarial en España que garanta o poder de compra dos salarios e permita pacificar a negociación colectiva", preguntouse o líder de CCOO.

"Que a patronal non se equivoque, as organizacións sindicais temos que mobilizar aos traballadores que están cos convenios bloqueados para que se enchan as rúas, para que as fábricas e os centros de traballo paren e consigamos romper esta barreira que nos impide poder manter os salarios", afirmou pola súa banda Pepe Álvarez.

"Non é verdade que as empresas non gañen diñeiro, que non estean nunha boa situación para poder afrontar aumentos de salarios, están nunha boa situación para poder aumentalos e se non haberá loita, haberá conflito", advertiu o líder de UXT.

Ao mesmo tempo reclaman ao Goberno un grande acordo social para repartir o impacto da suba dos prezos. Para avanzar nesta cuestión, o executivo central convocou unha reunión para esta tarde. Os sindicatos advirten de que non haberá acordo sen medidas valentes. "O Goberno ten que especificarnos que pon encima da mesa (...) é imposible un pacto de rendas sen medidas fiscais ofensivas e valentes", afirmou Álvarez.

O Goberno pídelles aos axentes sociais vontade para acadar un pacto de rendas que dea confianza aos traballadores e ás empresas. 

O presidente de CEOE, Antonio Garamendi, volveu hoxe a rexeitar, en declaracións a Onda Cero, un acordo que indexe as subidas salariais ao índice de prezos de consumo (IPC) para evitar os efectos de segunda rolda e a perda de competitividade das empresas.

Garamendi di estar a favor de que os salarios suban, pero en contra de incluír nun acordo marco unha cláusula que revise automaticamente os salarios coa inflación, xa que condicionaría a negociación colectiva e non todos os sectores poden asumilo.

Os empregados públicos tamén reivindican unha suba salarial logo de perder poder adquisitivo desde o 2010 e para compensar a alza dos prezos. O sindicato maioritario enviou unha carta ao presidente do Goberno para que desbloquee a negociación co Ministerio de Facenda.