Posturas distantes entre os axentes sociais ás portas da negociación do SMI
Os empresarios propoñen unha suba dun 1,5%
Os sindicatos elévana ao 7,5% con tributación
Coa mesa de negociación aínda sen data, os empresarios abren o debate da revalorización do salario mínimo interprofesional. "A suba tiña que ser cero, pero polo menos que sexa a que se formulou cos funcionarios.", propón Antonio Garamendi, presidente da CEOE.
Din os empresarios que o salario mínimo xa se sitúa por riba do 60% do salario medio, polo que limitan a suba a un e medio por cento. Unha cifra moi por baixo do obxectivo das organizacións sindicais. "A nosa proposta é que se suba o salario mínimo un 7 e medio por cento. E que poida comezar a cotizar a facenda", di desde a UGT Pepe Álvarez.
Ese cálculo do impacto tributario na contía do salario mínimo será unha das bases do informe encargado polo Goberno a un comité de expertos que servirá como punto de partida da negociación.
"Se o goberno de España ou unha parte do Goberno decide que tribute o SMI, compénsese a suba salarial e que sexa maior. Se é con tributación, xa lles digo que a suba vai ser relevante", adianta a vicepresidenta segunda do Goberno, Yolanda Díaz.
A proposta dos sindicatos deixaría o salario mínimo nos 1.273 euros brutos en 14 pagas, case 90 euros máis respecto do actual.
