A Xunta inicia un proxecto piloto para eliminar o aluminio na auga das traídas
Refírese ás augas de consumo humano nos sistemas de abastecemento autónomo, como traídas veciñais
En Galicia, máis de 650.000 persoas usan a auga deste tipo de traídas
A Consellería de Infraestruturas, a través de Augas de Galicia, impulsa un proxecto piloto para o estudo da eliminación do aluminio nas augas de consumo humano nos sistemas de abastecemento autónomo, como traídas veciñais, que en Galicia usan máis de 650.000 persoas.
Os traballos foron adxudicados á empresa Indrops Laboratorio de Análise e Calidade Ambiental S.L. por importe de 18.000 euros e forman parte da iniciativa da Xunta nas localidades pontevedresas de Oia, Baleira, Oímbra, Mondariz, San Xoán de Río e Cerdedo-Cotobade para a elaboración e implantación de plans de abastecemento autónomo.
No proxecto analizaranse as posibilidades técnicas para a retirada de aluminio das augas de abastecemento, coa posta en marcha dunha planta experimental en Oia para a eliminación este metal nunha traída seleccionada, así como o análise da auga de distintos pozos de barrena localizados na contorna dos puntos de captación.
As principais conclusións deste estudo, segundo informa a Xunta nunha nota de prensa, incorporaranse á elaboración de plans de abastecemento autónomo, iniciados no verán do ano pasado, para que os concellos seleccionados teñan información sobre o nivel de garantía do abastecemento de auga potable á poboación, máis aló das súas redes municipais.
A iniciativa forma parte do traballo da Xunta para a promoción da implantación de plans municipais de abastecemento autónomo entre os concellos galegos de menos de 5.000 habitantes, que conta cun investimento autonómico de 900.000 euros. EFE
