A Universidade da Coruña mantén o plan de implantar a titulación de Medicina

A Universidade da Coruña mantén a súa idea de implantar a titulación de Medicina a partir do curso 2027/2028, segundo remarcou este xoves o seu reitor, Ricardo Cao, que ofreceu "diálogo ata a extenuación" á Xunta, que describe a situación xerada por mor deste anuncio como "inédita".

O Goberno galego cre que esta previsión rompe co acordo alcanzado en 2015 entre o Executivo autonómico e as tres universidades para fortalecer os estudos de Medicina en Galicia, pois nel decidiuse manter unha única facultade e descentralizar a docencia clínica, sumando os recursos do conxunto dos hospitais universitarios galegos.

Tras a reunión do Consello de Docencia Clínica, celebrada nun día festivo na capital galega polas súas festas patronais, Cao comentou á prensa que para eles resultaba "fundamental" que a descentralización da docencia de Medicina en Galicia se producise co seu sistema universitario, e iso cumpriuse "moi timidamente".

Que a Universidade de Santiago (USC) teña a todos os hospitais de Galicia, incluídos -precisou- os que son universitarios, caso do CHUAC, como "vinculados", é algo que non entende. E a iso sumou Cao o temor a que se autorice unha universidade privada na cidade coruñesa que forme en Medicina. No encontro deste xoves, manifestou a súa "preocupación" polo feito de que poida ocorrer iso.

Asegurou que habería que pensar, ante un escenario así, "como se deciden as cousas a nivel das titulacións" pois as públicas precisan de órganos competentes, onde se discute sobre a procedencia, interese social, memoria socioeconómica e demais. "Non sempre é así no caso das privadas. Depende moito das comunidades autónomas", deixou caer.

O Consello de Goberno da Universidade da Coruña aprobou na véspera o primeiro paso para impartir Medicina, que ata o de agora só se ensina en Galicia na Universidade de Santiago, con 403 prazas anuais.

Un día despois, Cao dixo que "mantendo a nosa iniciativa" a disposición para falar é total, pois "forma parte do noso ADN". "Encantados", subliñou.

"Diálogo sempre, ata a extenuación, mantendo a nosa aposta", a cal vinculou á comunidade universitaria e non ao actual equipo directivo sen máis.

Ademais, comentou que a Xunta xa a coñecía "desde hai tempo" e que a semana pasada houbo contactos "ao máis alto nivel". O momento de dala a coñecer non foi "baladí", pois coincidiu co consello de goberno convocado.

É "froito dunha profunda reflexión", incidiu Cao, e puxo como exemplo Dereito, dado que no seu momento decidiuse que estivese presente nas tres universidades. "É a fórmula que estamos a propoñer", destacou, cunha "actitude propositiva".

Cao falou cos medios só, mentres que os conselleiros de Educación e Sanidade fixérono xunto aos reitores de Vigo e de Santiago.

 O titular do ramo educativo, Román Rodríguez, insistiu en que se trata dunha vivencia "inédita", absolutamente "nova no marco no que estamos a xogar". Invocou o mencionado acordo que pensa que é un marco de cooperación e pediu consenso, visión conxunta e non actuar "dun modo unilateral".

Producida esta primeira toma de contacto, avanzou que haberá outra en xuño para ver "posibilidades realistas" nun escenario de colaboración. Calquera nova titulación non pode ser por vía dunha decisión "concreta e unilateral", xa que "se buscou sempre un acordo".

Cominou así a manter ese espírito e a, con el, avanzar na descentralización porque "temos marxe" e "tempo" de expor avances, melloras e axustes se hai "estrés" ou "problemas" dentro do sistema actual. O interese xeral de Galicia e o uso sostible dos recursos é o que debe primar, puntualizou. 

O mesmo dixo o responsable da carteira sanitaria, Antonio Gómez Caamaño, que emprazou ao "diálogo", a falar "dentro dun marco". Convidou explicitamente a ser "realistas" e engadiu que "hai unicornios e hai a realidade".

O reitor da Universidade de Vigo, Manuel Reigosa, apostou por cinguirse a un acordo que é "mellorable" no sentido de que se pode dotar de "máis velocidade" á descentralización. Existen as "canles para mellorar" pensando no ben común e na maior calidade posible, que á súa parecer xa é moi alta e "podemos presumir moitísimo".

O seu homólogo na Universidade de Santiago, Antonio López, opina que hai unha "diferente interpretación sobre o que significa descentralizar". "Non hai unha subcontratación da docencia", precisou. E, como o resto, concluíu que no marco do acordo, e sobre os seus principios, está disposto "a falar".