A seca e a calor fan perder o 40 % do millo forraxeiro no centro de Galicia
Lemos, Chantada e Deza son as comarcas leiteiras máis afectadas
Agárdase unha caída da produción de leite a partir do outono
O 40 % do millo forraxeiro vaise perder en comarcas leiteiras como Lemos, Chantada ou o Deza por causa da seca e os golpes de calor. As chuvias destes días xa non serven para revitalizar os milleiros de plantas que secaron. As leiras máis afectadas son as que se sementaron máis tarde e colleron a seca de cheo. Para os gandeiros vai supoñer un incremento do gasto en forraxes e unha caída da produción de leite.
Esta colleita de millo era a máis importante da historia ante o problema de acceso a concentrados e cereais derivados da invasión de Ucraína. Agora pódese pasar dunha media de 40 toneladas de millo por hectárea a só 25. Un problema que afecta a viabilidade económica das explotacións pero que pode acabar repercutindo nos consumidores pola falta de leite no mercado en outono e inverno.
Nas comarcas leiteiras da costa agárdase unha boa colleita de millo pero insuficiente para abastecer as necesidades de todas as explotacións galegas.
