A roupa e o téxtil en xeral, as compras favoritas dos galegos en Portugal
A comida e a louza tamén teñen os seus fans
Vivir preto dunha fronteira ten moitas vantaxes porque aproveitas as mellores opcións de dous países. Entre elas a posibilidade de facer compras distintas, mellores ou máis baratas.
Os galegos imos a Portugal a mercar roupa para nós ou para a casa ou a cama. As toallas de Portugal seguen sendo moi recoñecidas e tamén se seguen vendendo por quilo nalgunhas tendas, igual que a louza, moi estimada, desde a básica ata as marcas como Vista Alegre.
Durante moito tempo tamén trouxemos café, manteiga salgada ou leite e xabrón de pintas.
Aínda hai españois que fan a compra en Portugal, pero sobre todo mercamos os famosos pasteis de Belén ou natas, bacallao e polo, os produtos que máis nos gusta consumir en Portugal.
