Portugal prohibe levar pezas que cubran o rostro en espazos públicos

A denominada 'lei do burka', que prohibe ocultar o rostro en espazos públicos e contempla multas de ata 3.000 euros, entrou este mércores en vigor en Portugal, trinta días despois da súa publicación no Diario da República.

A Lei 58/2026 impide utilizar neses espazos pezas destinadas a “ocultar ou obstaculizar a exhibición do rostro”, aínda que o seu articulado non menciona expresamente o burka, o niqab nin ningunha confesión relixiosa.

A prohibición aplícase na vía pública, os lugares abertos ao público, os destinados a servizos públicos e aqueles onde se presten servizos xeralmente accesibles aos cidadáns. Tamén alcanza á participación en acontecementos, competicións deportivas e manifestacións.

A norma establece excepcións cando a ocultación do rostro estea debidamente xustificada por razóns sanitarias, profesionais, artísticas, de entretemento ou publicitarias, así como por motivos de seguridade ou polas condicións climáticas.

Quedan igualmente fóra do seu ámbito de aplicación os avións, as instalacións diplomáticas e consulares, os lugares de culto e outros espazos considerados sacros, alén dos supostos autorizados por outra disposición legal. No ámbito relixioso, polo tanto, a excepción prevista no texto refírese os lugares de culto ou sagrados e non constitúe unha autorización xeral para ocultar o rostro por motivos relixiosos en calquera espazo público.

O incumprimento será castigado con multas de entre 150 e 750 euros cando se cometa por neglixencia e de entre 400 e 3.000 euros cando exista intencionalidade. Ademais, establece unha pena de ata dous anos de prisión ou unha multa penal de ata 240 días para quen, mediante ameazas, violencia, coacción, abuso de autoridade ou de poder e por razón do sexo da vítima, obrigue unha ou varias persoas a ocultar o rostro. A pena incrementarase nun terzo cando a vítima sexa menor de idade.

As forzas de seguridade serán responsables de vixiar a aplicación da norma e levantar as correspondentes actas, mentres que os concellos deberán tramitar os expedientes e impoñer as sancións.

A lei tamén prohibe coaccionar unha persoa para que cubra o rostro por motivos de xénero, relixión, idade ou orixe.

A iniciativa partiu de Chega (ultradereita, primeiro partido da oposición) e foi modificada durante a súa tramitación parlamentaria, entre outros aspectos para centrar a prohibición na identificación e a seguridade nos espazos públicos. O Parlamento portugués aprobou a norma o pasado 17 de xullo e o presidente da República, António José Seguro, promulgouna o 18 de agosto.