Os bombeiros de Ceuta atopan un asentamento de migrantes nuns túneles

Os bombeiros de Ceuta localizaron onte á noite un asentamento de migrantes en túneles subterráneos próximos ao Campus Universitario da cidade, en cuxo interior había decenas de persoas que abandonaron a zona por un incendio.

Segundo informaron a EFE fontes do Servizo de Extinción de Incendios (SEIS), o achado produciuse de forma casual despois de que uns veciños da contorna da barriada do Sarchal alertasen sobre unha columna de fume dunha galería subterránea.

Os bombeiros accederon a este lugar, que comunica a praia do Sarchal coa zona do campo de fútbol José Martínez Pirri, lindeiro coa sede da Universidade de Granada e a UNED na cidade.

Os bombeiros acharon no túnel todo tipo de restos de alimentos, colchóns, botellas e varios aveños que foran pasto das lapas, como balsas inchables e mesmo unha táboa de surf.

A zona podería albergar no seu interior decenas de migrantes que se escondían nestas galerías subterráneas durante a noite.

Os profesionais do SEIS determinaron que estas persoas lograron acceder ás galerías rompendo unha das paredes previamente tapiadas para abrir o paso polo que entraban os que chegaban polo Sarchal, ocultándose nesta zona.

O persoal dos bombeiros volveu tapiar esta galería.