A procura de piso en Santiago obriga os estudantes a facer noite na rúa
Centos de estudantes agardan durante horas ás portas das inmobiliarias ante a escaseza de vivenda
A altas horas da madrugada chegan os estudantes ás portas das inmobiliarias neste caso na capital galega. É o único xeito de conseguir un piso no que vivir durante o curso.
Ademais de madrugar e agardar horas en ringleira os estudantes fan o seu particular viacrucis polas inmobiliarias para tentar conseguir ese piso que máis se achegue ao 'bo, bonito e barato'. Pero nin con esas é doado.
A imaxe repítese cada verán. Fan metros e metros de ringleira e horas de agarda para tentar atopar vivenda para o curso que vén.
Ante a dificultade de conseguir algo, decidiron facer noite ás portas da inmobiliaria para seren dos primeiros en escoller. Organizan grupos para visitar os que hai e xa contan con pagar de 200 a 300 euros por cabeza.
