O estudante, unha das vítimas favoritas das estafas inmobiliarias

A desesperación por atopar piso lévanos moitas veces a cometer imprudencias á hora de alugar un. Dende fiarnos de imaxes, que parecen reais, pero son creadas con intelixencia artificial, ata crer na palabra dun descoñecido e aboar a fianza sen tan sequera ver o piso.

"Díxenlle que non podía ir a Madrid, gastar os cartos, loitar con outras 15 persoas da visita e marchar de Madrid sen ningún piso, así que lle preguntei se había algún modo de pagar unha reserva e quedar con el. Díxome que si, que aboase a fianza e que fose luns visitalo. De repente, cheguei a Madrid e non tiña onde durmir", conta Iván Durán, vítima dunha destas estafas inmobiliarias.

Moitas veces, caemos na trampa, ata realizando un pequeno labor de investigación: falando co suposto caseiro por chamada, comprobando o seu nome e o seu número de DNI ou incluso constatando que esa dirección existe.

"Primeiro observei certos detalles, como cara a que lado daban as ventás, entón, dende a aplicación de Google Earth, podía visitar virtualmente a rúa. Entón vin que si, que o piso estaba aí ben situado, que o portal era certo... Mesmo o DNI do, en teoría, propietario do piso tamén existía", comenta Iván Durán.

Para evitar este tipo de estafas, os profesionais inmobiliarios reiteran que a opción máis fiable é sempre ver o piso en persoa ou a través de alguén de confianza e comprobar que existe.

"Que polo menos un dos inquilinos faga unha viaxe e veña confirmar que existe a inmobiliaria, que existe o piso, que está todo ben... ou se ten algún familiar ou alguén de confianza que poida verificar todo", apunta Cristóbal López, axente inmobiliario.