A Policía Local de Betanzos frustra unha carreira ilegal polo polígono de Piadela

Un grupo de algo máis de medio cento de condutores pretendía converter as rúas deste polígono de Piadela nun circuíto improvisado.

"A partir das 23:00 horas comezaron a chegar coches. Nós escoitamos o ruído dos motores, asomámonos e xa vimos todo". "Empezaron a chegar coches por aquí, por esta rúa e había como 200 persoas a mirar", contan os veciños.

Os condutores viñan dispostos a correr e, polo que din os veciños ían ter público. Pero co que non contaban era con que a policía soubese polas redes sociais da convocatoria, e menos aínda, co operativo de vixilancia que montaron canda a Garda Civil.

"Un pouco antes da medianoite xa comezou a chegar a Policía Local e tamén a Garda Civil. Puxéronse nos lados onde estaba a xente, supoño que para parar a carreira, se a houbese". "Aí xa pararon un pouco. Malia que ruído seguiron facendo ata a unha da mañá. Eu estaba na cama e escoitábao".

Ruído foi todo canto puideron facer. Porque ao ver que os axentes permanecían na zona, tras algo máis de dúas horas de agarda, decidiron marchar e a suposta carreira ilegal non tivo lugar.

"Contra a unha ou dúas da mañá xa marcharon todos".

A veciñanza pide controis nesta zona industrial para evitar este tipo de prácticas e que a zona sexa un risco grave para a seguridade viaria.