En modo 'Tokyo Race' polo centro de Poio

Quecen motores, e a correr. Arranca o circuíto de rotondas por Poio. 

"Van amodiño e cando chegan un pouco máis adiante, aceleran "a corte", denuncia unha veciña. 

"Cítanse condutores con vehículos de certa cilindrada para facer derrapaxes nas rotondas e collen unha, dúas, tres e catro rotondas con condución temeraria", confirma Santiago Alfonsín, policía local de Poio.

Arrancadas bruscas, coches que compiten en paralelo, viraxes e derrapes. Os veciños están preocupados polo risco que supón.

"A partir do venres, na avenida Andurique é un caos de 'niñatos' cos coches facendo o kamikaze", engade a muller.

Un perigo incluso para os propios participantes. Esta última fin de semana bateron dous.

"Entraron na rotonda en diferentes sentidos e colidiron de fronte", explica Alfonsín.

Pero tamén fartos do ruído, e mesmo das ameazas cando lles chaman a atención. 

"Viña un camión e case o levan por diante. Hai peóns, animais, colonias de gatos, .... e se lles dis algo, aínda se revolven", lamenta a muller. 

Curioso, pero o mal tempo é un aliciente porque, co asfalto mollado, a derrapaxe resoa mellor. É parte do que buscan.

"Modifican as condicións técnicas dos vehículos para ter máis ruído e modifican a centraliña para aumentar a cilindrada do motor", advirte a Policía Local.

Grazas á colaboración da veciñanza, a Policía Local ten identificada algunha matrícula. Non é de Poio, pero non vén de lonxe.