Un mozo de 23 anos falece nun accidente na estrada que discorre polo paseo do río Rato, en Lugo
No interior do vehículo ían catro persoas, e os bombeiros tiveron que liberar tres, que quedaron feridas de diversa consideración
O condutor do automóbil é a vítima mortal da saída de vía
O accidente tivo lugar preto das dúas da mañá deste xoves. Foi unha saída de vía na estrada LU-P-2925 á altura do paseo do río Rato, en Lugo.
🔴 #AXEGAInforma dunha saída de vía que deixou unha persoa falecida en Lugo.
— 112 Galicia (@112Galicia) March 5, 2026
📍 Km. 1 da LU-P-2925, Paseo do Río Rato.
➡️ No coche viaxaban catro persoas, e tres delas foron excarceradas polos Bombeiros de Lugo. O falecido é o condutor do vehículo.
(1/2) pic.twitter.com/yKCluSkyt3
Segundo as primeiras informacións da Policía Local, un turismo que circulaba en dirección a Madrid por esta vía saíu da estrada e terminou chocando contra unha árbore. Como consecuencia do forte impacto, o condutor, un mozo de 23 anos, perdeu a vida e tivo que ser excarcerado, do mesmo xeito que o resto dos ocupantes, polos bombeiros que acudiron ao lugar do accidente.
No vehículo viaxaban ademais outras tres persoas, que quedaron feridas e foron evacuadas ao HULA. Unha delas atópase en estado moi grave, outra presenta feridas de carácter grave e a terceira sufriu lesións leves.
Foi un dos implicados quen chamou ao 112 Galicia pasadas as 01:50 horas desta madrugada explicando que acababan de ter unha saída de vía no quilómetro 1 da LU-P-2925, á altura do Paseo do Río Rato. O propio alertador sinalou que non daban saído ao exterior.
De inmediato, desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, os Bombeiros e a Policía Local de Lugo, a Garda Civil de Tráfico e os servizos de mantemento. Tamén se alertou ao Grupo de Intervención Psicolóxica en Catástrofes e Emerxencias, do Colexio Oficial de Psicoloxía de Galicia, por se fora necesaria a súa intervención.
Os bombeiros confirmaron desde o lugar que excarceraron tres persoas. Ao mesmo tempo, e malia os esforzos, confirmouse o falecemento do condutor do vehículo.
A Policía Local está elaborando o correspondente atestado do sinistro para determinar as causas exactas do mesmo.
