A piques de rematar a campaña da centola, con resultados satisfactorios para o sector

Ante a confraría do Grove amósannos dous dos últimos exemplares de centola desta campaña.

"Son dos últimos que pouco queda para que entren en veda. E temos aquí unha femia e mais un macho que xa son artistas por saír na televisión".

Antonio Otero, directivo da confraría do Grove, todo un referente tratándose de centola e centolo, falábanos dos quilos comercializados a 11 de xuño nesta campaña iniciada en novembro.

"Os datos que tiñamos onte, andabamos preto dos 70.000. Este ano imos un pouquiño por riba en prezo que o ano pasado", di Otero, e engade que "aquí o prezo máximo anda en trinta euros e nós temos o prezo de peche en doce euros, que desde que se abre a campaña é o prezo de retirada para que non chegue a cero. Xa non chega a doce. Os últimos andaron en quince ou así. A femia sempre cotiza máis que o macho, pero, ben, a maioría dos de aquí somos de macho, eh".

E no mercado de Pontevedra Margarita ofrecía esta mañá varias centolas.

"Sae moi, moi boa. Aínda agora a femia está a saír con coral, que é rarísimo neste tempo. Hai este tamaño que está sobre trinta e cinco euros o quilo, e logo estoutra máis pequena, sobre 25 ou 28 euros o quilo, tamén femia. Porque o macho no carro xa non está tan cheo, polo que traballamos máis ben a femia", explica a peixeira.

Antes de que acabe xuño empeza a veda. O marisqueo desta especie volverá en novembro coa esperanza dos e das profesionais de que polo menos iguale a actual campaña.

"O colectivo está contento. Pódese dicir que o da centola é dos poucos recursos que están sans. Non hai baixada nin en quilos nin en cartos", conclúe o vicepatrón do Grove.